أول دروس الرزاله نقلا عن صديق رزل جدااااااااااا... بس مش أنا طبعا

لو راكب فى باص أو ميكروباص وجنبك حد نايم اوعى تسيبه نايم ... كل شوية اقعد قول وصلنا عشان يصحى مخضوض... لو عمل اهبل صحيه وقوله مش انت نازل هنا بيتهيألى...لو مش نايم متسيبوش فى حاله برضه عيب عليك متجيش...ركز على سؤال واقعد اسألهوله كل شوية زى أنت نازل فين?... طب انت دفعت ولا لأ...? لو قاعد هو جنب الشباك جوه وقالك عدينى قوله رجلى منملة مش قادر وخليه ينط زى القرد...أو قوله ماتنزل من الشباك..لو انت فى أتوبيس وقاعد على كرسى وجنبك ناس واقفة استمتع بقى وخدك وقتك...اتمطع بقى وقول ياسلام على الراحة الواحد مكنش عارف هيعمل أيه لو مش قاعد...لو العكس بقى اقعد اسأل كل واحد انت نازل فين واقعد قول بصوت عالى ياجماعة محدش نازل قريب أصل انا عايز اقعد طول... مانت واقف قول كده لحد مايقعد..وكلما الكمسرى يجى ياخد منك الاجرة اسأله على تمن كذا مكان يعنى قوله هو لغاية الحتة الفلانية بكام طب? لغاية الحتة دى بكام?اسأل على تمن كل الاماكن اللى تعرفها لحد مايقولك ياعم خلصنى رايح فينقوله مانا عشان ابقى عارف بس وتقل فى العيار يمكن يسيبك ويمشى لما يدى حد تذكرة قوله ورينى كده لو سمحت واقعد اتأمل فيها لحد ما صاحبها يزهق ويشدها منك ....فى مفتش بقى ساعات بيطلع يفتش على التذاكر وبيطلع على السريع كده وينزل ...أنت بقى اوعى تديهاله علطول كده أزعل منك والله ...دور عليها ساعة حط ايدك فى جيوبك مية مرة هيقولك خلص يا استاذ قوله ثوانى كانت معايا واللهواقلع الجذمة ودور فيها وفى الاخر طلعها من بوقك بعد مايكون هو مات من الملل وقوله مش قولتلك كفاية كده بقى حرام المفروض تنزل قبل الناس ماتموت منك ...أستنى رايح فين أنت نازل عادى كده ولا كأنك رذل ولا حاجة ...وأنت نازل هيبقى فى ناس واقفة أعمل نفسك مش عارف تعدى وحاول تجاهد على قد ماتقدر وتضيع الوقت اللى تقدر عليه لحد الناس ماتشيلك وترميك بعد ماتكون جبتلهم السكر ورفعت ضغطتهمكده إنتهت الحصة الأولى

موقف عجيب... جميل ... يمكن مضحك

وده موقف حصلى فى المترو...انا كنت واقف فى علبه السردين الى هى المترو سابقا ومفيش نفس لبنى ادم لدرجة انى فى بعض المحطات الناس معرفتش تدخل اصلا من الباب...المهم انى طويل بدرجة تكفينى لان استنشق الهواء النقى بينما صاحبى الى واقف جنبى قصير مش شامم غير عرق قمصان البشر وروايح زى الفل الصراحة .... المهم انا بعدى الامور دى لانها مش فارقة لغاية لما لقيت واحد راجل عجوز قصير شوية وبيستنجد بيا انه مش نازل غير محطة حسنى مبارك وهو عارف انى فى السادات... ودى المحطة اللى انا نازل فيها..... الناس كلها بتندفع وبتاخد اللى طالع واللى نازل .... بس المهم انى وعدت الراجل انه يمسك فيا وانا هحميه وأصد الغزو من ورا .... جت محطة السادات من هنا وعينك متشوف الا النور والراجل مش مدى على خوانه .... لقيت كل الناس تقريبا فى العربية نازله السادات وهو تقريبا برضه الوحيد اللى نازل حسنى مبارك وده لأنى ملقتش تفسير للى حصل لما لقيت الراجل طالع معايا او على كتفى على السلم المتحرك فى محطة السادات وبيقولى ... ( عليا الطلاق منا رايح الشغل )..... حد عنده تفسير؟!!!!!
Reply to Your PostDelete PostEdit Post