أولا:حبيبتى انا ماستهلكيش(هيييه وهوا ده حال الدنيا , الولد بيضحى علشان الدكتور قالوه هاتموت الاسبوع الى جاى فامش لازم يعذبها معاه )
ثانيا:انا بعمل كده علشانك انتى( ايوه ماحنا عارفين باباها قالو لو ماسبتهاش هاحرمها من الميراث
ثالثا: انا هاسيبك علشان مش عاوز اى حد يتكلم عليكى نص كلمه( ياراجل وانت لسه فاكر دلوقتى مالبنت اتشحورت والحمد لله بسببك وخلاص الى حصل حصل
رابعا:انا مش عاوزك تزعلى مينى(يارااااجل وانت لما تسبها هاتعمل فرح وتدبح عجلين يعنى ؟!لا والنبى هاتزغرد لولولولى الواد سابنى انا فرحانه
خامسا: انا هاهاجر ومش عارف هارجع امتى(طب ماتخدها معاك يامعلم ولا هيا حجج وخلاص
سادسا:أنا مانفعش ارتبط بواحده مشيت معاها(ياراجل ان شاء الله ربنا هايكرمك وترتبط بوحده مشيت مع نص شباب شبرا ومصر القديمه كمان
سابعا: انتى احسن حد عرفته فى حياتى بس مش هاينفع نكمل( ترد هيا بقى وهيا بتعيط ئهئ ئهئ ئهئ ليه ليه ليه .. يقولها علشان خطرى انا ماستحملش دموعك ... وبرده مايقولهاش
ثامنا:انتى اكتر حد حبيته فى حياتى بس برده زى ماقولتلك مش هاينفع نكمل(لا تعليق
تاسعا:حبيبتى انا اكتشفت ان مافيش مابينا حاجه متشابهه (لأ بجد....بألو سنتين ماشى معاها وبعدين لسه مكتشف ده , الظاهر عليه كان بيكتشف مقبرة جديده فى اسوان ولا حاجه
عاشرا:والله ياحببتى انا مش وحش وبلعب بمشاعر البنات زى مانتى فاكرة بس هوا ده نصيبنا(لا ماهو واضح
رأيى الشخصى
نقول ايه البوست ده اولا للضحك وثانيا للضحك لتوصيل فكرة بطريقه لذيذة ومش معنى كده ان كل الولاد وحشين وان كل البنات ملايكه وده كمان مش يدى الحق للبنات انها تشتم الولاد وبعدين فى شباب كتير بتقول كده بجد وبتحس الكلام ده بجد وبتكون صادقه مش كله بيكدب فى 5% صادقين واكيد اكتر بكتير ... احنا بنهدى نفوس بس مش اكتر
